AQUEL DÍA, CANDO ESPERTOU, O SEÑOR RABBIT VIU ALGO RARO...

ACLARACIÓN: AS NOTAS EN ABALAR COMEZARÁN A APARECER A PARTIR DAS 12:00 DO DÍA 3

Boas, familias!

Hoxe venres comezarían as vacacións de Semana Santa polo que NON vou mandar ningún traballo imprimible estes días. Penso que os nenos e nenas teñen que descansar e ser conscientes de en que días do calendario vivimos en cada momento e intentar facer unhas tempadas diferentes ás outras.

Tan só lles propoño durante esta semana, voluntariamente, escribir un conto sobre un coelliño de Pascua que comece así:

“AQUEL DÍA, CANDO ESPERTOU, O SEÑOR RABBIT VIU ALGO RARO…”

Que non haxa máis tarefas non quita que debamos seguir facendo certas rutinas coma a lectura diaria e é que, hoxe máis ca nunca, NON HAI MELLOR AMIGO CA UN LIBRO. E xa que estas vacacións non imos poder ir a ningures, teremos que viaxar coas historias dos contos e dos cómics que teñamos na casa.

Aproveitade tamén para ver algunha película ou serie que vos guste, escoitar música que nos axude a canalizar as nosas emocións, pintar, debuxar, facer receitas de cociña, bailar, soñar, facer ioga con algún vídeo de Youtube…

Á volta das vacacións, comezaría o terceiro trimestre. O traballo dos mestres está sendo guiado por diferentes instrucións que vai publicando a Consellería de Educación. Neste momento, e mentras non se publiquen instrucións novas, a miña idea é a seguinte:

Ao volver de Semana Santa, cada luns  subirei dúas cousas

1-      O RETO DA SEMANA que será unha actividade máis lúdica á que deberedes contestar cunha fotografía ou cun pequeno vídeo. Isto sírvenos para entreternos e vernos uns aos outros (este luns aínda que sexan vacacións tamén subirei reto).

2-     Un documento no que explicarei tódalas tarefas que os nenos deben facer durante a semana diferenciadas por área. Non serán moitas. É mellor facer dúas ben, ca tres mal. E intentaremos ir avanzando nos contidos que nos quedan por dar que, en realidade, son poucos. Xunto con este documento explicativo da semana, subireivos as tarefas que os nenos/as deberán facer. Sempre haberá, ademais, actividades de reforzo e de repaso. Comezaremos con isto o luns 13 de abril. Para as explicacións dos contidos novos utilizarei vídeos ou breves explicacións escritas que eles poderán ler antes de facer os exercicios.

Cabe destacar que todo este traballo é totalmente VOLUNTARIO. Eu fago unha proposta e vós adaptádela á vosa realidade. Téndesme aquí para o que precisedes.

Aproveito para deixarvos uns DOCUMENTOS QUE PODEDES UTILIZAR COMO RUTINA para que os nenos escriban algo.

Un trátase dun modelo de “DIARIO DE CORENTENA” que poden escribir tódolos días. Outro é un “DIARIO DE FIN DE SEMANA”. Na escola os luns sempre adicabamos os primeiros minutos a falar da fin de semana polo que agora, se lles apetece, poden escribir o que fixeron. É unha moi boa maneira de practicar a expresión escrita.

O terceiro documento trátase dunha “REFLEXIÓN DOS VENRES” destacando as mellores cousas da semana para intentar sacar algo positivo disto que nos está tocando vivir.

Cada un de vós pode elixir o que máis lle guste dos 3 e facelo coma unha rutina máis. Non é necesario imprimir. Podedes usar diarios que teñades pola casa ou facelo nun caderno ou folios seguindo os meus modelos. 

Déixovos tamén un documento con INSTRUCIÓNS PARA ESCRIBIR O CONTO DO SEÑOR RABBIT. Cando o teñades escrito, se queredes, podedes enviarme unha fotografía na que se poida ler a vosa historia e ireinas colgando. Entendo que o que ma envía por correo autoriza que publique a foto. Se non é así, que mo faga saber no e-mail dicíndome que non acepta a publicación no blog. 

RESUMINDO:

• LUNS DÍA 6: subirei novo reto, pero ningún traballo. 
• TAREFA DE SEMANA SANTA: conto do Señor Rabbit. 
• PROPOSTA DA PROFE COMO RUTINA DE CORENTENA: escribir un diario cada día, escribir o diario da fin de semana ou escribir a reflexión dos venres.
• LUNS DÍA 13 e vindeiros luns: Comezamos a enviar traballo semanal.

Agardo que pasedes estas vacacións o mellor posible.